Sadakat islami Forum

Yâresi muhtâc-ı kâfûr olmasın bir kimsenin
Sîneden meh-pâresi dûr olmasın bir kimsenin

Anber-i deryâ-yı pîç ü tâb mevc-i satrıdır
Nâmı bu defterde mestûr olmasın bir kimsenin

Gamze-veş mahmûr u bîmâr olmadan bulmaz emân
Lutf-i hüsne tab’ı mağrûr olmasın bir kimsenin

Fitnekâr-ı aşkda yâ Rab şeh-i endîşesi
Leşker-i zülf üzre mansûr olmasın bir kimsenin

Çeşm-i yârı zevk-ı mey bed-mest-i nâz etti dirîğ
Mâtemi hem-hâne-i sûr olmasın bir kimsenin

Dil verip ağyâr-perver şûha men gibi gedâ
Düşmen-i bed-hâhı mesrûr olmasın bir kimsenin

Laht laht olup dili âyîne-i sad-pâre-veş
Merhemi jengâr-ı nâsûr olmasın bir kimsenin

Gayret-i aşk eyler Es’âd kâse-i ömrün şikest
Hem-sifâl-i bezmi fağfûr olmasın bir kimsenin